| Summary: | Ad celebrandum diem quo abhinc decem annis Pius XI Constitutionem Apostolicam « Deus scientiarum Dominus » promulgavit, hac commentatione de illius origine et spiritu disseritur. Ac primum quidem exponitur quibus rationibus Pontifex motus sit, ut studiis academicis ecclesiasticis novas leges praescriberet. Paulatim enim in variis nationibus variae factae erant graduum academicorum normae et condiciones: in aliis Facultatibus theologicis disciplinarum positivarum numerus ac momentum valde auctum erat, idque cum damno haud exiguo theologiae dogmaticae; in aliis vero antiquior modus conservatus quidem erat, sed ita ut tempus gradibus obtinendis necessarium valde diminueretur et institutio de rebus positivis satis neglegeretur. Quare Pius XI nova lege utriusque systematis damna vitare, utilitates obtinere studuit, ita tamen ut imprimis solida in disciplinis fundamentalibus institutio curaretur. Nova igitur lex synthesis quaedam est studii speculativi et positivi, in qua disciplinae tractandae non simpliciter iuxtaponuntur, sed pro singularum vi ac momento quasi hierarchice ordinatur (principales, auxiliares, speciales). Centrum quasi ac fundamentum est « disciplina praecipua » de qua universa candidatus ad Licentiam in examine peculiari rationem reddere debet. Reliquae disciplinae, cum principales tum maxime auxiliares ad disciplinam praecipuam quasi ordinentur eamque adiuvent necesse est; quo « aequilibrio » turbato periculum esset, ne studium academicum damnum pateretur, non ex indole et natura ipsius legis, sed propter minus rectam eius interpretationem. Institutio autem de rebus positivis earumque methodo curatur disciplinis specialibus (« specialisatio ») et Exercitationibuis, cum ea tamen moderatione, ut Auditores rebus positivis non opprimantur aut a studiis disciplinae praecipuae retrahantur. — Demum ad plenum legis fructum obtinendum statuendum erat de Auditoribus ad studia academica rite praeparandis, quae praeparatio fit tam formatione classico-humanistica quam (si agitur de futuris theologis) studio philosophiae scholasticae rite ordinato et saltem per biennium agendo.
|
|---|