| Summary: | Generalis aestimatio Metaphysicae nostris temporibus atque diversitas in definienda eius methodo circumscribendisque materiis patefaciunt, eam etiam transitoriis momentis historicis quadantenus obnoxiam esse. Quare in omni metaphysica constructione variabilia haec elementa probe ab illis discernenda sunt, quae in vera Metaphysica non possunt non esse perennia. Historia Metaphysicae teste, in genere patet, in ea quaedam adhuc obscura puncta ac disputabilia assignari posse; in specie vero ostenditur, apud Aristotelem doctrinas de singulari substantia ac de entis divisione in actum et potentiam sub influxu praeoccupationis criticae doctrinarum praecedentium philosophorum ingeniose elaboratas esse. A pari ergo monstrandum est, criticismum Kantii in multis influxui deberi systematum rationalismi et empirismi, quibuscum Kantius critice congreditur, ex quibus aliqua principia eaque funesta assumsit, quae eum ad destructionem omnis theoreticae Metaphysicae et ad novam voluntaristicae Metaphysicae methodum logice adduxerunt. Hanc comparativam methodum ad summos quosque philosophos applicare oporteret, ut Historia Philosophiae speculationi systematicae ac criticae melius inserviret.
|
|---|