| Summary: | Occasione adventus Pii VI Vindobonam immanis disceptatio publica concitata est, cui in Monarchia Austriaca anno 1781 decreta « erweiterte Preßfreiheit » validos stimulos admovit. Brevissimo tempore plus quam 100 libelli et varia opuscula in vulgus prodierunt. Josephus II, de sua existimatione sollicitus, non parum ad hanc disceptationem contulit, sicque adventum Summi Pontificis Vindobonam secundum suam propriam visionem adumbravit. Antonius Venceslaus Princeps Kaunitz, cancellarius Status, ne ecclesiasticae novationes josephinae, quae illo tempore executioni mandabantur, in periculum propter papalem adventum vocarentur, earum divulgationem et defensionem promovit. His omnibus ecclesiaeque constitutioni josephinae, ex qua novationes ad canonum praescripta conformari debebant, libellorum auctores partis ultramontanae intra et extra Monarchiam Austriacam obstabant. Eos tum Nuntius Vindobonensis, Josephus Garampi, tum cardinalis Christophorus Antonius Comes Migazzi, archiepiscopus Vindobonensis, suffragantes moderabantur. Haec disputatio quaestiones suscitavit circa officium Papae (« Was ist der Pabst? »), circa leges ecclesiasticas josephinas, circa problemata coelibatus et tolerantiae, circa vim, quam adventus Papae in populum haberet, et denique circa sic dictam « dévotion au Pape ».
|
|---|